جاتني فكرة الخطف من مسلسل حكاية نرجس.. ننشر التحقيقات واعترافات المتهمة بخطف رضيعة الحسين
أربعاء, مايو 06 2026
جاتني فكرة الخطف من مسلسل حكاية نرجس.. ننشر التحقيقات واعترافات المتهمة بخطف رضيعة الحسين
أوراق قضية خطف رضيعة الحسين، التي وقعت منتصف الشهر الماضي، بمنطقة الجمالية بالقاهرة، وحوت الأوراق اعترافات المتهمة بخطف الرضيعة، ودوافعها لارتكاب الجريمة وطريقة التخطيط وآليات التنفيذ، وكيف تمكنت من التودد لوالدة الرضيعة، وكيف هربت بها، وكم من المركبات استقلت، وكيف وقعت في قبضة رجال الشرطة.
وجاءت أقوال المتهمة بخطف رضيعة الحسين أمام جهات التحقيق كالآتي:
اسمي صفاء ح، عندي 39 سنة، مقيمة بمساكن المحافظة الإسكان الاجتماعي بمدينة بدر في القاهرة، وأعمل ربة منزل.
اللي حصل إن أنا كنت متجوزة واحد من 2005 ومخلفة منه ولد وبنت ومحصلش نصيب واتطلقت منه 2020، وبعد كده اتعرفت على جوزي الحالي اللي اسمه محمود، واتجوزنا في أول سنة 2025 وحملت منه أول مرة بس للأسف الحمل مكملش، وسقّطت الطفل في الشهر الثالث قضاء الله وقدره، تقريبا كان في شهر 6 سنة 2025 وساعتها قلت لجوزي إن ده قضاء ربنا وإنه إن شاء الله هيعوضنا، وبعد كده حملت منه ثاني في شهر 12 سنة 2026 بس برضو وأنا راجعة من شغلي في العاصمة الإدارية كنت راكبة عربية فمرة واحدة أخد مطبات جامدة فسقط ثاني وكنت في الشهر الثالث وأنا ساعتها خفت أقول لجوزي.
وأضافت المتهمة بخطف رضيعة الحسين في التحقيقات: استغليت إن جوزي شغال في الجبل في العاصمة وإنه بييجي يقعد معايا يوم واحد في الأسبوع، ورحت فكرت إني أخبي عليه وأشوف هتصرف إزاي، وبالصدفة كنت بتفرج على مسلسلات رمضان وكان فيه مسلسل اسمه حكاية نرجس وكانت ساعتها فيه لقطة إن بطلة الفيلم كانت بتخطف العيال من المستشفى فالفكرة عجبتني، وفکرت أعمل زيها.
واستكملت: رحت يوم مستشفى الحسين الجامعي في الجمالية عشان أشوف الدنيا هناك ماشية إزاي، ولبست نقاب علشان محدش يعرفني ولا يجيبني بالكاميرات، ورحت أول يوم 8 أبريل 2026 ركبت ميكروباص من مدينة بدر ونزلت على رمسيس، ومن رمسيس ركبت تمناية ونزلت عند المستشفى، ودخلت أكشف في قسم الباطنة لقيت الدنيا زحمة، فاتمشيت في المستشفى، وقلت لو لقيت عيل لسة مولود هاخده وأروح بيه لجوزي، أقوله إني أنا اللي ولدته، لكن معرفتش أخطف عيل فروّحت على بيتي.
تاني يوم 9 أبريل، رحت بنفس الطريقة على مستشفى الحسين الجامعي، ودخلت المستشفى برضه عشان أكشف وفي نفس الوقت لو لقيت عيل أخطفه، وفعلًا دخلت قسم الباطنة وكشفت على نفسي، وبعد كده طلعت من قسم الباطنة كشفت في قسم النساء، وفضلت أدوّر على عيل عشان أخطفه لكن برضه معرفتش، فروّحت على البيت تاني.
واعترفت المتهمة: يوم 14 أبريل رحت على المستشفى لتالت مرة عشان أخطف عيل، فرحت على قسم النساء وساعتها قابلت ستات كتيرة كانت بتولد، وحاولت أقرب على أي واحدة فيهم، لكن كله كان بيبعدني لحد لما قابلت البنت سارة وكانت ماشية في الطرقة، بتاعت قسم النساء وأمها مسنداها ومعاها حاجات كتيرة، وعرضت عليهم المساعدة ووافقوا، وفضلت مسندة سارة لحد لما دخلوها السرير بتاعها، وبعد كده هي ولدت وفضلت قاعده معاهم شوية.
بعد كده قلت لأم سارة تروح تجيب كوباية ينسون لبنتها علشان كانت تعبانة من العملية، وأنا كنت أقصد أقولها كده علشان أبعدها عن بنتها، وهي فعلًا سمعت کلامي وراحت تجيب اليانسون بس جوزها كان وصل ووقف معانا فقلت له ينزل يجيب ورقة العلاج اللي المستشفى كتباها لسارة وبالمرة يجيب بيبرونة للطفلة، فنزل فعلًا وأول لما جوزها طلع من الغرفة ومبقاش موجود حد من أهلها معاها وأنا بس اللي موجودة ساعتها الطفل كان معايا وسارة راحت في النوم من تعب العملية فاستغليت الفرص دي وأخدت الطفلة وطلعت برة الغرفة بتاعتها وفي نصف الطريق خبيت الطفلة تحت الخمار بتاع النقاب اللي كنت لابساه.
وطلعت برة المستشفى أخدت تاكسي ورحت على المقطم وبعدين ركبت ميكروباص رحت بيه لآخر المقطم، وبعدين ركبت ميكروباص تاني ووداني للعاشر، ومن العاشر ركبت ميكروباص ورحت على الدائري ناحية التجمع الخامس، وبعدين ركبت ميكروباص نزلت منه عند كوبري طريق السويس، وبعدين ركبت عربية سيزوكي ورحت على مدينة الشروق، ومن الشروق ركبت عربية سيزوكي ودتني على الإسكان في مدينة بدر ودخلت على سوبر ماركت جبت منه لبن للطفلة وبيبرونة وبامبرز وبعدين روّحت على الشقة بتاعتي اللي في بدر.
واختتمت اعترافاتها: وبعد كده كلمت جوزي وقلت له إني ولدت بنت فجالي تاني يوم الصبح وكان فرحان بالبنت قوي وبعد كده النهاردة الضهر لقيت الباب بتاع الشقه بيخبّط فرحت فتحت الباب لقيت الحكومة والشرطة واقفة قدامي أخدوني وأخدوا البنت الصغيرة وودّوني على قسم الشرطة، وبعد كده ودوني على النيابة وده كل اللي حصل.
سيتم تحسين تجربتنا على هذا الموقع من خلال السماح بملفات تعريف الارتباط
التعليقات 0